វេចនានុក្រមរុក្ខជាតិ
ប្រើប្រាស់ក្នុងប្រទេសកម្ពុជា
អំពីវេចនានុក្រម
លោកស្រីបណ្ឌិត ឌីផុន ប៉ូលីន
THE HISTORY
Copyright DY PHON PAULINE
.png)
យើងខ្ញុំមានបំណងប្រមូលផ្ដុំនាមរុក្ខជាតិ នៅប្រទេសកម្ពុជា ក្នុងសៀវភៅតែមួយរហូតដល់ឥឡូវមិន ទាន់មានអ្នកណាបានធ្វើការងារនេះនៅឡើយ។ យើងខ្ញុំចាប់ផ្ដើមធ្វើការ ដើម្បីបំពេញកង្វះនេះ ជាច្រើនឆ្នាំ ហើយ។
យើងខ្ញុំចាប់ផ្ដើមធ្វើការ ដើម្បីបំពេញកង្វះនេះ ជាច្រើនឆ្នាំ ហើយ។ យើងអាចនិយាយថា សៀវភៅនេះ ជាលទ្ធផលនៃការបង្ហាត់បង្រៀនខាងភូតគាមសាស្ត្រ ចំនួន ១២ ឆ្នាំ នៅសកលវិទ្យាល័យភូមិន្ទភ្នំពេញ ហើយនិងការស្រាវជ្រាវខាងភូតគាមសាស្ត្រ ជាបន្តមកទៀត តាំងពី ឆ្នាំ១៩៨១ មក នៅសារមនី្ទរជាតិ ផ្នែកប្រវត្តិសាស្ត្រធម្មជាតិ នាទីក្រុងប៉ារីស ។
សៀវភៅនេះ សរសេរជាបីភាសា (អង់គ្លេស, បារាំង, ខ្មែរ) អំពីរុក្ខជាតិថ្នាក់ខ្ពស់ ដែលយើងស្គាល់ឈ្មោះជាខ្មែរ និងដឹងរបៀបប្រើប្រាស់នៅកម្ពុជាចំនួន ១២៥៤ ពូជរុក្ខជាតិ ។ យើងមិនលើកយកពូជ រុក្ខជាតិ ដែលយើងមិនស្គាល់ឈ្មោះ ជាខ្មែរមកទេ។
យើងសង្ខេបអត្ថាធិប្បាយយ៉ាងខ្លីបំផុត អំពីពូជរុក្ខជាតិនិមួយៗតាមគំរោងដូចខាងក្រោម៖
- បែបផែនជីវភាព (ព្រឹក្ស, ចុល្លព្រឹក្ស, តិណជាតិ ឬ វល្លិ)
- ទីកន្លែងដុះ (បែបផែនទីព្រៃ ដែលគេអាចរកពូជរុក្ខជាតិនោះ ឃើញ)
- តំបន់ដុះ (ប្រទេស ឬទ្វីប ដែលមានរុក្ខជាតិនោះដុះ)
- ការប្រើប្រាស់ពូជរុក្ខជាតិនោះ នៅកម្ពុជា
FOREWORD
ខ្ញុំរភើបចិត្តជាខ្លាំងចំពោះបំណងលោកស្រី បណ្ឌិត ឌី ផុន ប៉ូលីន ដែលចង់អោយខ្ញុំធ្វើអារម្ភកថា សំរាប់សៀវភៅដ៏ប្រសើរនេះ ។ ខ្ញុំដឹងប្រាកដថាលោកស្រីបណ្ឌិត មានគុណសម្បត្តិដ៏ប្រពៃ ក្នុងឋានៈជាអ្នកស្រាវជ្រាវ និងជាគ្រូបង្ហាត់បង្រៀន ក្នុងវិស័យជីវសាស្រ្តរុក្ខជាតិត្រូពិក ជាពិសេសគឺជីវសាស្ត្ររុក្ខជាតិនៅកម្ពុជា ។
ក្នុងពេលខ្ញុំស្នាក់ជាច្រើនដងនៅប្រទេសខ្មែរ ក្នុងតួនាទីជាអ្នកធ្វើសន្និសិទ និងជាទីប្រឹក្សាផ្នែកសាគរសាស្រ្តនេសាទ ខ្ញុំបានពត៌មានពីការអោយតំលៃខ្ពស់លើការបង្ហាត់បង្រៀន និងស្រាវជ្រាវរបស់លោកសី្រ បណ្ឌិត ឌី ផុន ។ ខ្ញុំមានសេចក្តីត្រេកអរជាខ្លាំង ក្រោយបានស្គាល់លោកស្រី ។ ខ្ញុំបានទទួល គុណប្រយោជន៍អំពីចំណេះដ៏ធំទូលាយរបស់លោកស្រីបណ្ឌិត ។ ខ្ញុំក៏បានសង្កេតការកោតសរសើរ អំពីសំណាក់រដ្ឋាភិបាលកម្ពុជា និងពីសំណាក់ប្រទេសជិតខាង ដែលបានតែងតាំងលោកស្រីបណ្ឌិតជាប្រធានគណៈកម្មការ “ វិទ្យាសាស្រ្ត និងការបណ្តុះបណ្ដាល ” នៃរដ្ឋាភិបាលកម្ពុជា (មានបុព្វសិទ្ធិដូចរដ្ឋមន្ត្រី) រួចមកជាសមាជិកា អង្គការរដ្ឋមន្ត្រីអប់រំជាតិ របស់ប្រទេសអាស៊ីអាគ្នេយ៍ សំរាប់ជីវសាស្ត្រប្រទេសក្តៅ (ត្រូពិក) ។
ក្រោយពីវឹកវរផ្នែកនយោបាយជាច្រើនឆ្នាំ ការវឹកវរដែលផ្លាស់បុរេសនាពោរពេញដោយសន្តិភាព និងដំរេះប្រាជ្ញា អោយទៅជាការជំលៀសនិរទេសដ៏ចុកចាប់បំផុតចំនួន ៤ ឆ្នាំ លោកស្រីបណ្ឌិត ឌី ផុន បានរួចរស់ចាកចេញទៅនៅប្រទេសបារាំង ក្នុងឋានៈជាអ្នកជ្រកកោននយោបាយ ។ សារមនី្ទរជាតិប្រវត្តិសាស្ត្រ ធម្មជាតិក៏បានទទួលលោកស្រីអោយធ្វើជាអ្នកស្រាវជ្រាវនៅទីក្រុងពិសោធន៍អប្បដិច្ឆន្នជាតិ ។ នៅទីនោះ លោកស្រីសិក្សា ស្រាវជ្រាវ សមុច្ច័យដែលតាំងទុកជាយូរមកហើយ លោកស្រីបានសំរាំង “ ខ្លឹមបណ្ដូល ” ហើយបានរកឃើញប្រភេទថ្មី៥ សំរាប់ឥណ្ឌូចិន និងពូជរុក្ខជាតិថ្មី៤ សំរាប់ផែនដីទាំងមូល។ កិច្ចការលោកស្រី មួយចំនួនធំខាងផ្នែកជីវសាស្ត្រ កម្ពុជា និងរុក្ខជាតិប្រភេទក្តៅទូទៅ បានទទួលរង្វាន់ពីបណ្ឌិតសភាវិទ្យាសាស្ត្រ ។
លក្ខណៈ ឧត្តមនៃចរិក និងការងាររបស់លោកស្រីបណ្ឌិត ឌី ផុន បានបណ្ដាលអោយអាជ្ញាធរបារាំង សំរួលបេសកម្មសំខាន់ៗទៅទីកន្លែងផ្សេងៗ ក្នុងពិភពលោកជូនលោកស្រី ។ ចំណែកនៅកម្ពុជា គ្រាន់តែស្ថានការណ៍បានធូរស្រាលបង្គួរ លោកស្រីបណ្ឌិត ឌី ផុន ក៏អញ្ជើញធ្វើដំណើរសិក្សាស្រាវជ្រាវជាច្រើនដង ។
ប៉ុន្តែបំណងចំបង និងជាយូរមកហើយរបស់លោកស្រី គឺសំរេចការរៀបរៀងសៀវភៅដែលជាដើមចមបង្អស់ សម្រាប់មាតុប្រទេសលោក គឺវចនានុក្រមជាបីភាសា អំពីនាមខ្មែរ របស់រុក្ខជាតិថ្នាក់ខ្ពស់នៅកម្ពុជា ទីកន្លែងដុះ ការប្រើប្រាស់ ជាអាហារ ជាឱសថ។ល។ សេចក្តីរាយការណ៍ក្បោះក្បាយអំពីវិទ្យានិពន្ធនេះ មានក្នុងឧបសម្ព័ន្ធនៅទីខាងចុងសៀវភៅ ។
អ្វីដែលគួរអោយកត់សំគាល់ គឺសារៈសំខាន់របស់សៀវភៅនេះ សំរាប់ប្រជាជនកម្ពុជាគ្រប់ស្រទាប់ និងសំរាប់ប្រជាជននៅប្រទេសក្តៅសកលលោក ហើយនិងសំរាប់អ្នកជីវសាស្ត្រ។ ម្យ៉ាងទៀត សៀវភៅនេះ ជាផលផ្លែ នៃវិញ្ញាណភូតតាមដែលមិនគ្រាន់តែទាក់ទងស្អិត និងប្រពន្ធិកវិទ្យា បរិស្ថានវិទ្យា និងវិន័យ ខាងជីវសាស្ត្ររុក្ខជាតិប៉ុណ្ណោះទេ ថែមទាំងបើកបង្ហាញការអនុវត្តន៍ នៃជីវសាស្ត្ររុក្ខជាតិ នឹងសហការណ៍បារាំង-ខ្មែរ ដ៏ជាគំរូ ក្រៅពីសហការណ៍ជាមួយប្រទេសដទៃទៀតជាច្រើន។
ខ្ញុំសូមជូនពរដ៏កក់ក្តៅបំផុត ដល់ការផ្សព្វផ្សាយទូលាយរបស់វចនានុក្រមនេះ ដូចជាការរួមចំណែកក្នុងការប្រែមុខមាត់ថ្មី របស់ប្រទេសកម្ពុជាដែលមានអតីតកាលថ្កើងរុងរឿង ។
សរសេរដោយលោកសាស្ត្រាចារ្យ MAURICE FONTAINE
សមាជិកក្រុមបណ្ឌិតសភា នៃវិជ្ជាស្ថានប្រទេសបារាំង
ចំណាត់ថ្នាក់នៃរុក្ខជាតិ
.png)
អារម្ភកថា
ប្រិយមិត្តអ្នកអានជាទីមេត្រី!
ក្នុងគោលបំណងចង់ឲ្យវចនានុក្រម "រុក្ខជាតិប្រើប្រាស់ក្នុងប្រទេសកម្ពុជា" និពន្ធដោយលោកស្រី ឌីផុន ប៉ូលីន កាន់តែមានអត្ថន័យ និងខ្លឹមសារជ្រាលជ្រៅបន្ថែមទៀត ស្របទៅតាមតម្រូវការចាំបាច់លើវិស័យចំណេះដឹង តាមសម័យកាលដោយសនិទានភាព ក៏ដូចជាងាយស្រួលទំនាក់ទំនងក្នុងប្រព័ន្ធឌីជីថល ក្នុងបរិបទសង្គមបច្ចុប្បន្ន។
ដោយកន្លងមកមានការខ្វះខាត អសន្តិសុខ ជួបការលំបាកខ្វះមធ្យោបាយក្នុងដំណើរចូលក្នុងព្រៃដើម្បីស្រាវជ្រាវយករូបថតដាក់ក្នុងវចនានុក្រមពុំទាន់បានគ្រប់គ្រាន់។
នាងខ្ញុំ សុខា ផល្លី នាមដើម តាន់ ផល្លី ព្រមទាំងកូនស្រីទាំង២ និងក្រុមគ្រួសារបង្កើតរបស់លោកស្រី ឌីផុន ប៉ូលីន នាមដើម តាន់ ប៉ូលីន មានបំណងចង់ថែរក្សាវចនានុក្រម "រុក្ខជាតិប្រើប្រាស់ក្នុងប្រទេសកម្ពុជា" ឲ្យមានប្រយោជន៍ និងសារៈសំខាន់សម្រាប់ប្រិយមិត្ត អ្នកអាន និស្សិត សិស្សានុសិស្ស អ្នកស្រាវជ្រាវ កាន់តែប្រសើរតាមកាលវេលា និងមានបែបផែនថ្មីបន្ថែម ដើម្បីបន្សល់ស្នាដៃដែលលោកស្រីបណ្ឌិត ឌីផុន ប៉ូលីន បានខំប្រឹងប្រែង អស់កម្លាំងកាយ កម្លាំងចិត្ត ប្រាជ្ញាស្មារតី និងធនធានរបស់ខ្លួន រៀបរៀងជាស្នាដៃទុកសម្រាប់អ្នកស្រាវជ្រាវជំនាន់ក្រោយប្រើប្រាស់ជាប្រយោជន៍តាមតម្រូវការរបស់គេរៀងៗខ្លួន។
ការបោះពុម្ពលើកនេះ ធ្វើឡើងដោយវាយអត្ថបទសារជាថ្មី ទៅតាមសៀវភៅដើម និងមានការកែអក្ខរាវិរុទ្ធ មួយចំនួនតាមលំនាំដើមដែលអ្នកនិពន្ធមានស្រាប់។ មូលហេតុវាយអត្ថបទសារជាថ្មី ព្រោះឯកសារក្នុងកុំព្យូទ័រសម័យកាលនោះមិនច្បាស់ និងត្រូវលុបបាត់ឯកសារមួយចំនួន។ លក្ខណៈសំខាន់ចង់ដាក់ក្នុងប្រព័ន្ធ App (Website) ដើម្បីឲ្យយុវជន សិស្សានុសិស្ស អ្នកស្រាវជ្រាវជំនាន់ក្រោយ ប្រិយមិត្តអ្នកអាន ងាយនឹងស្រាវជ្រាវរកពាក្យដែលខ្លួនត្រួវការយកមកប្រើ។
ឆ្លៀតក្នុងឱកាសដ៏ថ្លៃថ្លានេះ នាងខ្ញុំឧកញ៉ាបណ្ឌិត តាន់ ផល្លី សូមខន្ដី អភ័យទោសជាមុនចំពោះកង្វះខាតដែលអាចកើតមានឡើងជាយថាហេតុ ចំពោះបទវិភាគថ្មីនេះ នឹងសូមរង់ចាំទទួលនូវមតិកែលម្អដោយសុទ្ធចិត្តពីសំណាក់ប្រិយមិត្តអ្នកអាន។
សូមប្រិយមិត្តទទួលបាននូវសុខភាពល្អបរិបូរណ៍ បញ្ញាញាណភ្លឺថ្លា និងជោគជ័យ ត្រចេះត្រចង់ក្នុងជីវិត។
លោកជំទាវឧកញ៉ា បណ្ឌិត តាន់ ផល្លី
បណ្ឌិតស្រាវជ្រាវគ្រប់គ្រងពាណិជ្ជកម្ម និង
បណ្ឌិតស្រាវជ្រាវទស្សនវិជ្ជា